ಕಾರವಾರ: ಯಕ್ಷಗಾನ ರಂಗದ ಅತ್ಯಂತ ಜನಪ್ರಿಯ ಮತ್ತು ಹಿರಿಯ ಹಾಸ್ಯ ಕಲಾವಿದರಾದ ಕಾಸರಕೋಡು ಶ್ರೀಧರ್ ಭಟ್ (52) ಅವರು ಇಂದು (ಜುಲೈ 31) ನಿಧನರಾಗಿದ್ದಾರೆ. ಕೆಲವು ದಿನಗಳಿಂದ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಕಾರವಾರದಿಂದ ಮಂಗಳೂರಿನ ಆಸ್ಪತ್ರೆಗೆ ಸಾಗಿಸುವ ಮಾರ್ಗಮಧ್ಯೆ ಕೊನೆಯುಸಿರೆಳೆದಿದ್ದಾರೆ.
ಅವರ ನಿಧನದಿಂದ ಯಕ್ಷಗಾನ ರಂಗದ ಪ್ರಮುಖ ಹಾಸ್ಯ ತಾರೆಯೊಬ್ಬರು ಕಣ್ಮರೆಯಾದಂತಾಗಿದ್ದು, ಕಲಾ ಲೋಕಕ್ಕೆ ತುಂಬಲಾರದ ನಷ್ಟ ಉಂಟಾಗಿದೆ.
ಮೂರೂವರೆ ದಶಕಗಳ ಕಲಾ ಸೇವೆ:
ಕಾಸರಕೋಡು ಶ್ರೀಧರ್ ಭಟ್ ಅವರು ಯಕ್ಷಗಾನ ರಂಗದಲ್ಲಿ ಸುಮಾರು 35 ವರ್ಷಗಳಿಗೂ ಹೆಚ್ಚು ಕಾಲ ಸಕ್ರಿಯವಾಗಿ ಸೇವೆ ಸಲ್ಲಿಸಿದ್ದರು. ತಮ್ಮ ವಿಶಿಷ್ಟ ಹಾಸ್ಯ ಶೈಲಿ, ಚುರುಕಿನ ಸಂಭಾಷಣೆ ಮತ್ತು ಮುಖಭಾವದ ಮೂಲಕ ಪ್ರೇಕ್ಷಕರನ್ನು ನಗೆಗಡಲಲ್ಲಿ ತೇಲಿಸುತ್ತಿದ್ದ ಇವರನ್ನು ಅಭಿಮಾನಿಗಳು ಪ್ರೀತಿಯಿಂದ “ಹಾಸ್ಯ ಚಕ್ರವರ್ತಿ” ಎಂದು ಕರೆಯುತ್ತಿದ್ದರು. ಯಕ್ಷಗಾನದ ಪ್ರಸಿದ್ಧ ಮೇಳಗಳಾದ ಸಾಲಿಗ್ರಾಮ, ಮಂದಾರ್ತಿ, ಗುಂಡಬಾಳ ಮತ್ತು ಜಲವಳ್ಳಿ ಮೇಳಗಳಲ್ಲಿ ಪ್ರಧಾನ ಹಾಸ್ಯ ಕಲಾವಿದರಾಗಿ ಸೇವೆ ಸಲ್ಲಿಸಿ, ಸಹಸ್ರಾರು ಅಭಿಮಾನಿ ಬಳಗವನ್ನು ಗಳಿಸಿದ್ದರು.
ಕಂಬನಿ ಮಿಡಿದ ಕಲಾ ಲೋಕ:
ಶ್ರೀಧರ್ ಭಟ್ ಅವರ ಹಠಾತ್ ನಿಧನಕ್ಕೆ ಯಕ್ಷಗಾನದ ಹಿರಿಯ-ಕಿರಿಯ ಕಲಾವಿದರು, ಮೇಳದ ಯಜಮಾನರು ಹಾಗೂ ಅಪಾರ ಕಲಾಭಿಮಾನಿಗಳು ತೀವ್ರ ಆಘಾತ ಮತ್ತು ಕಂಬನಿ ಮಿಡಿದಿದ್ದಾರೆ. ಮೃತರ ಆತ್ಮಕ್ಕೆ ಶಾಂತಿ ಸಿಗಲಿ ಮತ್ತು ಅವರ ಕುಟುಂಬಕ್ಕೆ ಈ ದುಃಖವನ್ನು ಭರಿಸುವ ಶಕ್ತಿಯನ್ನು ಭಗವಂತ ನೀಡಲಿ ಎಂದು ಗಣ್ಯರು ಸಂತಾಪ ಸೂಚಿಸಿದ್ದಾರೆ.
Leave a Reply