ಬೆಂಗಳೂರು:
ಸಾರ್ವಜನಿಕ ಆರೋಗ್ಯ ರಕ್ಷಣೆ ಮತ್ತು ಯುವ ಪೀಳಿಗೆಯನ್ನು ಮಾರಕ ವ್ಯಸನಗಳಿಂದ ಮುಕ್ತಗೊಳಿಸುವ ನಿಟ್ಟಿನಲ್ಲಿ ಕರ್ನಾಟಕ ಸರ್ಕಾರವು ಅತ್ಯಂತ ಕಟ್ಟುನಿಟ್ಟಿನ ಕ್ರಮ ಕೈಗೊಂಡಿದೆ. ರಾಜ್ಯಾದ್ಯಂತ ತಂಬಾಕು ಅಥವಾ ನಿಕೋಟಿನ್ ಹೊಂದಿರುವ ಗುಟ್ಕಾ ಮತ್ತು ಪಾನ್ ಮಸಾಲಾಗಳ ತಯಾರಿಕೆ ಹಾಗೂ ಮಾರಾಟವನ್ನು ತಕ್ಷಣದಿಂದ ಜಾರಿಗೆ ಬರುವಂತೆ ಮುಂದಿನ ಒಂದು ವರ್ಷದ ಅವಧಿಗೆ ಸಂಪೂರ್ಣವಾಗಿ ನಿಷೇಧಿಸಿ ಆಹಾರ ಸುರಕ್ಷತೆ ಮತ್ತು ಜಾಗೃತ ದಳದ ಆಯುಕ್ತರು ಅಧಿಕೃತ ಅಧಿಸೂಚನೆ ಹೊರಡಿಸಿದ್ದಾರೆ.
ಆಹಾರ ಭದ್ರತೆ ಮತ್ತು ಗುಣಮಟ್ಟ ಕಾಯ್ದೆ-2006 ರ ಸೆಕ್ಷನ್ 30(2)(a) ಹಾಗೂ ಆಹಾರ ಭದ್ರತೆ ಮತ್ತು ಗುಣಮಟ್ಟ ನಿಯಮಾವಳಿಗಳು-2011 ರ ನಿಯಮ 2.3.4 ರ ಅಡಿಯಲ್ಲಿ ಈ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ.
‘ಟ್ವಿನ್ ಪ್ಯಾಕೆಟ್’ ಉಪಾಯಕ್ಕೂ ಕಡ್ಡಾಯ ನಿಷೇಧ
ಹಿಂದೆ ಗುಟ್ಕಾ ನಿಷೇಧವಿದ್ದಾಗ ಮಾರುಕಟ್ಟೆಯಲ್ಲಿ ಕಾನೂನಿನ ಕಣ್ಣಿಗೆ ಮಣ್ಣೆರಚಲು ಪಾನ್ ಮಸಾಲಾವನ್ನು ಒಂದು ಕಡೆ ಮತ್ತು ತಂಬಾಕನ್ನು ಮತ್ತೊಂದು ಪ್ರತ್ಯೇಕ ಪ್ಯಾಕೆಟ್ನಲ್ಲಿ (ಟ್ವಿನ್ ಪ್ಯಾಕೆಟ್) ಮಾರಾಟ ಮಾಡಲಾಗುತ್ತಿತ್ತು. ಗ್ರಾಹಕರು ಇವೆರಡನ್ನೂ ಕೊಂಡು ತಾವೇ ಮಿಶ್ರಣ ಮಾಡಿ ಸೇವಿಸುತ್ತಿದ್ದರು. ಆದರೆ, ಸರ್ಕಾರದ ಈ ಹೊಸ ಆದೇಶವು ಇಂತಹ ಎಲ್ಲಾ ಪ್ರತ್ಯೇಕ ಅಥವಾ ಮಿಶ್ರಿತ ಮಾರಾಟವನ್ನೂ ಕಡ್ಡಾಯವಾಗಿ ನಿಷೇಧಿಸಿದೆ. ಅಂತಿಮ ಉತ್ಪನ್ನದಲ್ಲಿ ತಂಬಾಕು ಅಥವಾ ನಿಕೋಟಿನ್ ಅಂಶವನ್ನು ಒಳಗೊಂಡಿರುವ ಪ್ಯಾಕ್ ಮಾಡಲಾದ ಅಥವಾ ಪ್ಯಾಕ್ ಮಾಡದ ಯಾವುದೇ ಚೂಯಿಂಗ್ ಉತ್ಪನ್ನಗಳಿಗೆ ಈ ಆದೇಶ ಅನ್ವಯಿಸಲಿದೆ.
ಪೂರೈಕೆ ಜಾಲಕ್ಕೆ ಪೆಟ್ಟು, ಆದರೆ ಸೇವನೆಗಲ್ಲ
ಇಲಾಖೆಯ ಪ್ರಕಟಣೆಯ ಪ್ರಕಾರ, ಈ ನಿಯಮವು ಮುಖ್ಯವಾಗಿ ವಾಣಿಜ್ಯ ಸರಬರಾಜು ಸರಪಳಿಯನ್ನು (Supply Chain) ಗುರಿಯಾಗಿಸಿಕೊಂಡಿದೆ. ಅಂದರೆ, ಮಾರುಕಟ್ಟೆಯಲ್ಲಿ ಇವುಗಳ ಲಭ್ಯತೆಯೇ ಇಲ್ಲದಂತೆ ಮಾಡಲು ಇವುಗಳ ಬೃಹತ್ ಉತ್ಪಾದನೆ, ದಾಸ್ತಾನು ಮತ್ತು ಮಾರಾಟವನ್ನು ತಡೆಯಲಾಗುತ್ತದೆಯೇ ಹೊರತು, ವೈಯಕ್ತಿಕ ಬಳಕೆಯ (Consumption) ಮೇಲೆ ಯಾವುದೇ ನೇರ ನಿಷೇಧ ಹೇರಿಲ್ಲ.
ಕಟ್ಟುನಿಟ್ಟಿನ ಜಾರಿಗೆ ತನಿಖಾ ದಳ ಸನ್ನದ್ಧ
ಆದೇಶ ಜಾರಿಗೆ ಬಂದ ತಕ್ಷಣವೇ ಆಹಾರ ಸುರಕ್ಷತಾ ಅಧಿಕಾರಿಗಳ (Food Safety Officers) ನೇತೃತ್ವದಲ್ಲಿ ರಾಜ್ಯಾದ್ಯಂತ ವಿಶೇಷ ತನಿಖೆ ಮತ್ತು ಜಾರಿ ಕಾರ್ಯಾಚರಣೆಗಳನ್ನು (Special Drives) ಚುರುಕುಗೊಳಿಸಲಾಗಿದೆ. ನಿಯಮ ಉಲ್ಲಂಘಿಸುವ ತಯಾರಕರು ಹಾಗೂ ವ್ಯಾಪಾರಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲು ಮತ್ತು ಪರವಾನಗಿ ರದ್ದುಪಡಿಸಲು ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ. ಅಕ್ರಮವಾಗಿ ಎಲ್ಲಾದರೂ ಇವುಗಳ ಮಾರಾಟ ಕಂಡುಬಂದಲ್ಲಿ ಸಾರ್ವಜನಿಕರು ತಕ್ಷಣವೇ ಆಹಾರ ಸುರಕ್ಷತಾ ಅಧಿಕಾರಿಗಳಿಗೆ ಮಾಹಿತಿ ನೀಡಿ, ಆರೋಗ್ಯವಂತ ಮತ್ತು ವ್ಯಸನಮುಕ್ತ ಕರ್ನಾಟಕ ನಿರ್ಮಾಣಕ್ಕೆ ಸಹಕರಿಸಬೇಕು ಎಂದು ಆಹಾರ ಸುರಕ್ಷತೆ ಮತ್ತು ಔಷಧ ಆಡಳಿತ ಇಲಾಖೆ ವಿನಂತಿಸಿದೆ.
Leave a Reply