ಬೆಂಗಳೂರು: ರಾಜ್ಯ ರಾಜಕಾರಣದಲ್ಲಿ ತೀವ್ರ ಕುತೂಹಲ ಮೂಡಿಸಿರುವ ಕರ್ನಾಟಕ ವಿಧಾನಸಭೆಯಿಂದ ವಿಧಾನಪರಿಷತ್ನ (Karnataka Legislative Council) 7 ಸದಸ್ಯ ಸ್ಥಾನಗಳಿಗೆ ನಡೆಯಲಿರುವ ದ್ವಿವಾರ್ಷಿಕ ಚುನಾವಣೆಗೆ ಕೊನೆಗೂ ಅಧಿಕೃತ ಅಧಿಸೂಚನೆ ಹೊರಡಿಸಲಾಗಿದೆ. ಇಂದಿನಿಂದಲೇ (ಜೂನ್ 1) ನಾಮಪತ್ರ ಸಲ್ಲಿಕೆ ಪ್ರಕ್ರಿಯೆ ಆರಂಭವಾಗಿದ್ದು, ಜೂನ್ 8ರವರೆಗೆ ಅಭ್ಯರ್ಥಿಗಳು ತಮ್ಮ ಉಮೇದುವಾರಿಕೆಯನ್ನು ಸಲ್ಲಿಸಬಹುದಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.
ವಿಧಾನಪರಿಷತ್ ದ್ವೈವಾರ್ಷಿಕ ಚುನಾವಣೆಯ ಚುನಾವಣಾಧಿಕಾರಿಯೂ ಆಗಿರುವ ವಿಧಾನಸಭೆ ಕಾರ್ಯದರ್ಶಿ ಎಂ.ಕೆ. ವಿಶಾಲಕ್ಷಿ ಅವರು ಈ ಸಂಬಂಧ ಅಧಿಕೃತ ಪ್ರಕಟಣೆ ಹೊರಡಿಸುವ ಮೂಲಕ ಚುನಾವಣಾ ಪ್ರಕ್ರಿಯೆಗಳಿಗೆ ಚಾಲನೆ ನೀಡಿದ್ದಾರೆ.
ಚುನಾವಣೆಯ ಪ್ರಮುಖ ದಿನಾಂಕಗಳ ಕಂಪ್ಲೀಟ್ ಟೈಮ್ಟೇಬಲ್:
-
ನಾಮಪತ್ರ ಸಲ್ಲಿಕೆ ಅವಧಿ: ಜೂನ್ 1 ರಿಂದ ಜೂನ್ 8ರ ವರೆಗೆ.
-
ನಾಮಪತ್ರಗಳ ಪರಿಶೀಲನೆ: ಜೂನ್ 9 ರಂದು ನಾಮಪತ್ರಗಳ ಸ್ಕ್ರೂಟಿನಿ ನಡೆಯಲಿದ್ದು, ಅಂದು ಸಂಜೆ ವೇಳೆಗೆ ಸಿಂಧುವಾದ (ಅರ್ಹ) ನಾಮಪತ್ರಗಳ ಪಟ್ಟಿಯನ್ನು ಪ್ರಕಟಿಸಲಾಗುತ್ತದೆ.
-
ನಾಮಪತ್ರ ವಾಪಸ್ ಪಡೆಯಲು ಕೊನೆಯ ದಿನ: ಜೂನ್ 11 ರವರೆಗೆ ಉಮೇದುವಾರಿಕೆಯನ್ನು ಹಿಂತೆಗೆದುಕೊಳ್ಳಲು ಅವಕಾಶವಿರುತ್ತದೆ.
-
ಮತದಾನದ ದಿನಾಂಕ: ಚುನಾವಣಾ ಕಣದಲ್ಲಿ 7 ಸ್ಥಾನಗಳಿಗಿಂತ ಹೆಚ್ಚು ಅಭ್ಯರ್ಥಿಗಳಿದ್ದರೆ ಮಾತ್ರ ಜೂನ್ 18ರಂದು ಬೆಳಿಗ್ಗೆ 9 ಗಂಟೆಯಿಂದ ಸಂಜೆ 4 ಗಂಟೆಯವರೆಗೆ ಮತದಾನ ಪ್ರಕ್ರಿಯೆ ಜರುಗಲಿದೆ.
-
ಮತ ಎಣಿಕೆ: ಜೂನ್ 18 ರಂದು ಸಂಜೆ 5 ಗಂಟೆಯಿಂದಲೇ ಮತ ಎಣಿಕೆ ಕಾರ್ಯ ಆರಂಭವಾಗಲಿದ್ದು, ಅಂದೇ ತಡರಾತ್ರಿ ಫಲಿತಾಂಶ ಹೊರಬೀಳಲಿದೆ.
ಜೂನ್ 30ಕ್ಕೆ ಈ 7 ಪ್ರಮುಖ ಪರಿಷತ್ ಸದಸ್ಯರ ಅವಧಿ ಅಂತ್ಯ!
ಪ್ರಸಕ್ತ ಮೇಲ್ಮನೆಯ ಸದಸ್ಯರಾಗಿರುವ ವಿವಿಧ ಪಕ್ಷಗಳ ಪ್ರಮುಖ 7 ನಾಯಕರು ಜೂನ್ 30 ರಂದು ಅಧಿಕೃತವಾಗಿ ನಿವೃತ್ತಿ ಹೊಂದಲಿದ್ದಾರೆ. ಇವರ ನಿವೃತ್ತಿಯಿಂದ ತೆರವಾಗಲಿರುವ ಸ್ಥಾನಗಳ ಭರ್ತಿಗಾಗಿಯೇ ಭಾರತೀಯ ಚುನಾವಣಾ ಆಯೋಗವು (ECI) ಈ ಪ್ರಕಟಣೆ ಹೊರಡಿಸಿದೆ. ನಿವೃತ್ತಿಯಾಗಲಿರುವ ಸದಸ್ಯರ ವಿವರ ಇಲ್ಲಿದೆ:
| ಕ್ರಮ ಸಂಖ್ಯೆ | ಸದಸ್ಯರ ಹೆಸರು | ರಾಜಕೀಯ ಪಕ್ಷ |
| 1 | ಬಿ.ಕೆ. ಹರಿಪ್ರಸಾದ್ | ಕಾಂಗ್ರೆಸ್ (Congress) |
| 2 | ನಾಸಿರ್ ಅಹಮದ್ | ಕಾಂಗ್ರೆಸ್ (Congress) |
| 3 | ಗೋವಿಂದರಾಜು | ಕಾಂಗ್ರೆಸ್ (Congress) |
| 4 | ತಿಪ್ಪಣ್ಣಪ್ಪ | ಕಾಂಗ್ರೆಸ್ (Congress) |
| 5 | ಎಂಟಿಬಿ ನಾಗರಾಜ್ | ಬಿಜೆಪಿ (BJP) |
| 6 | ಸುನೀಲ್ ವಲ್ಯಾಪುರೆ | BJP (ಬಿಜೆಪಿ) |
| 7 | ಪ್ರತಾಪ್ ಸಿಂಹ ನಾಯಕ್ ಕೆ. | ಬಿಜೆಪಿ (BJP) |
ಈ ಏಳು ನಾಯಕರ ನಿವೃತ್ತಿಯಿಂದ ತೆರವಾಗುವ ಸ್ಥಾನಗಳಿಗೆ ಈಗ ಹೊಸದಾಗಿ ಶಾಸಕರಿಂದ ಮತದಾನ ಪ್ರಕ್ರಿಯೆ ನಡೆಯಲಿದ್ದು, ಯಾರೆಲ್ಲಾ ಮೇಲ್ಮನೆಗೆ ಎಂಟ್ರಿ ಕೊಡಲಿದ್ದಾರೆ ಎಂಬುದು ತೀವ್ರ ಕುತೂಹಲ ಮೂಡಿಸಿದೆ.
Leave a Reply