ಒಡಿಶಾದ ಬಾಲಸೋರ್ ಜಿಲ್ಲೆಯ ತುಡಿಗಡಿಯಾ ಮಾರುಕಟ್ಟೆಯಲ್ಲಿ ಜುಲೈ 10, 2026 ರ ರಾತ್ರಿ ಸಿನಿಮೀಯ ರೀತಿಯಲ್ಲಿ ಎಟಿಎಂ ಕಳ್ಳತನಕ್ಕೆ ಯತ್ನಿಸಿದ ಆಘಾತಕಾರಿ ಘಟನೆ ನಡೆದಿದೆ. ಕಪ್ಪು ಬಣ್ಣದ ಮಹೀಂದ್ರ ಥಾರ್ (Mahindra Thar) ಎಸ್ಯುವಿಯಲ್ಲಿ ಬಂದ ಮೂರರಿಂದ ನಾಲ್ಕು ಜನರ ಕಳ್ಳರ ತಂಡ, ಇಂಡಿಯಾ1 (India1) ಎಟಿಎಂ ಕಿಯೋಸ್ಕ್ ಒಡೆದು ಒಳನುಗ್ಗಿದೆ. ನಂತರ ಭಾರಿ ತೂಕದ ಎಟಿಎಂ ಯಂತ್ರವನ್ನು ದಪ್ಪನೆಯ ಹಗ್ಗದಿಂದ ಕಟ್ಟಿ, ಅದನ್ನು ವಾಹನಕ್ಕೆ ಕಟ್ಟಿ ಎಳೆದೊಯ್ಯಲು ವಿಫಲ ಯತ್ನ ನಡೆಸಿದ್ದಾರೆ.
ಈ ಇಡೀ ಕೃತ್ಯದ ಸರಿಸುಮಾರು 2 ನಿಮಿಷಗಳ ಸಿಸಿಟಿವಿ ದೃಶ್ಯಾವಳಿಗಳು ಲಭ್ಯವಾಗಿವೆ. ಭಾರೀ ತೂಕದ ಎಟಿಎಂ ಯಂತ್ರವನ್ನು ಕಳ್ಳರು ಹರಸಾಹಸ ಪಟ್ಟು ಎಳೆದಾಡುತ್ತಿರುವುದು, ಈ ವೇಳೆ ಹಗ್ಗ ತುಂಡಾಗಿರುವುದು ಹಾಗೂ ಯಂತ್ರವನ್ನು ಎತ್ತಲು ವಿಫಲ ಪ್ರಯತ್ನ ನಡೆಸಿರುವುದು ವಿಡಿಯೋದಲ್ಲಿ ಸೆರೆಯಾಗಿದೆ. ಕತ್ತಲೆಯಲ್ಲಿ ವಾಹನದ ಕೆಂಪು ಟೈಲ್ ಲೈಟ್ ಬೆಳಕಿನಲ್ಲಿ ಕಳ್ಳರು ವಾಹನವನ್ನು ಮತ್ತೆ ಮತ್ತೆ ಹಿಂದಕ್ಕೆ, ಮುಂದಕ್ಕೆ ಚಲಾಯಿಸಿ ಯಂತ್ರವನ್ನು ಎಳೆಯಲು ಯತ್ನಿಸುತ್ತಿರುವುದು ಹಾಗೂ ಹಿನ್ನೆಲೆಯಲ್ಲಿ ಬೀದಿ ಪ್ರಾಣಿಗಳು ಓಡಾಡುತ್ತಿರುವುದು ದೃಶ್ಯದಲ್ಲಿ ಸ್ಪಷ್ಟವಾಗಿ ಗೋಚರಿಸಿದೆ.
ಈ ಸಿನಿಮೀಯ ಕಳ್ಳತನದ ಯತ್ನದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರು ಇದು ಜನಪ್ರಿಯ ವೆಬ್ ಸರಣಿ “ಪ್ರೀತಂ ಮತ್ತು ಪೆದ್ರೋ” (Pritam & Pedro) ದೃಶ್ಯವನ್ನು ಹೋಲುತ್ತದೆ ಎಂದು ಕಾಮೆಂಟ್ ಮಾಡುತ್ತಿದ್ದಾರೆ. ಖದೀಮರು ಈ ವೆಬ್ ಸರಣಿಯಿಂದಲೇ ಸ್ಫೂರ್ತಿ ಪಡೆದು ಇಂತಹ ಕೃತ್ಯಕ್ಕೆ ಕೈಹಾಕಿದ್ದಾರೆ ಎಂದು ಸಾರ್ವಜನಿಕರು ಚರ್ಚಿಸುತ್ತಿದ್ದಾರೆ. ಎಟಿಎಂನಿಂದ ನಗದು ದೋಚಲು ನಡೆದ ಈ ಅರ್ಧಂಬರ್ಧ ಯತ್ನದ ಕುರಿತು ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದು, ಆರೋಪಿಗಳ ಪತ್ತೆಗಾಗಿ ತೀವ್ರ ತನಿಖೆ ಹಾಗೂ ಶೋಧ ಕಾರ್ಯ ಮುಂದುವರಿಸಿದ್ದಾರೆ.
Leave a Reply