ಯಲ್ಲಾಪುರದ ನಾಗರಾಜ್ ಕವಡಿಕೇರಿ ಅವರ ‘ರಕ್ತ’ಚರಿತ್ರೆ..... -

ಹಂಚಿಕೊಳ್ಳಿ

ಯಲ್ಲಾಪುರ : ರಕ್ತದಾನಕ್ಕೆ ವಯಸ್ಸು ಅಡ್ಡಿಯಲ್ಲ, ಬದಲಿಗೆ ಜೀವ ಉಳಿಸಬೇಕೆಂಬ ಸದಾಶಯ ಮುಖ್ಯ ಎಂಬುದನ್ನು ಯಲ್ಲಾಪುರ ತಾಲೂಕಿನ ಕವಡಿಕರೆಯ ಗ್ರಾಮದ ನಾಗರಾಜ್ ಕವಡಿಕೇರಿ ಅವರು ಸಾಬೀತುಪಡಿಸಿದ್ದಾರೆ.
ಪ್ರಸ್ತುತ 53 ವರ್ಷ ವಯಸ್ಸಿನ ಇವರು ಬರೋಬ್ಬರಿ 69 ಬಾರಿ ರಕ್ತದಾನ ಮಾಡುವ ಮೂಲಕ ನೂರಾರು ಜನರಿಗೆ ಮರುಜೀವ ನೀಡಿದ್ದಾರೆ. ಕೇವಲ ಮಾನವೀಯ ಸೇವೆಯಷ್ಟೇ ಅಲ್ಲದೆ, ಸಾಮಾಜಿಕ, ಧಾರ್ಮಿಕ ಹಾಗೂ ಸಹಕಾರಿ ರಂಗದಲ್ಲೂ ಇವರು ಮುಂಚೂಣಿಯಲ್ಲಿ ನಿಂತು ತಾಲೂಕಿನಾದ್ಯಂತ ಸದ್ದಿಲ್ಲದೆ ಮೌನ ಕ್ರಾಂತಿ ಮಾಡುತ್ತಿದ್ದಾರೆ.

75 ಕ್ಕೂ ಹೆಚ್ಚು ರಕ್ತದಾನಿಗಳನ್ನು ಸಂಘಟಿಸಿದ ನಾಗರಾಜ್!!
ಇಂದಿನ ದಿನಗಳಲ್ಲಿ ರಕ್ತದಾನ ಮಾಡಲು ಯುವ ಪೀಳಿಗೆಯೇ ಹಿಂದೇಟು ಹಾಕುವ ಉದಾಹರಣೆಗಳ ನಡುವೆ, 53 ವರ್ಷದ ನಾಗರಾಜ್ ಕವಡಿಕೇರಿ ಅವರ ಸಾಧನೆ ಯುವಕರಿಗೇ ಮಾದರಿ ಆಗುವಂತಿದೆ. ರಕ್ತದಾನ ಎಂದರೆ ಭಯಗೊಳ್ಳುತ್ತಿದ್ದ ಅದೇಷ್ಟೊ ಜನರಿಗೆ ಮಾದರಿಯಾಗುವಂತೆ ತಾನೆ ನಿರಂತರವಾಗಿ ರಕ್ತದಾನ ಮಾಡುದರ ಮೂಲಕ ಅವರ ಭಯ ಹೋಗುವಂತೆ ಮಾಡಿದ್ದಲ್ಲದೆ ಚಂದಗುಳಿ- ನಂದೊಳ್ಳಿ ಭಾಗದಲ್ಲಿ ಸುಮಾರು 75 ಕ್ಕೆ ಹೆಚ್ಚು ರಕ್ತದಾನಿಗಳ ತಂಡವನ್ನೆ ಕಟ್ಟಿರಿವುದು ಹಲವರಿಗೆ ಮಾದರಿಯಾಗಿದೆ. ತುರ್ತು ಪರಿಸ್ಥಿತಿ, ಅಪಘಾತ ಅಥವಾ ಹೆರಿಗೆಯಂತಹ ಕಠಿಣ ಸಂದರ್ಭಗಳಲ್ಲಿ ರಕ್ತ ಸಿಗದೆ ಪರದಾಡುವ ಕುಟುಂಬಗಳಿಗೆ ಇವರ ರಕ್ತದಾನ ಸಂಜೀವಿನಿಯಾಗಿದೆ. ತಮ್ಮ 53ನೇ ವಯಸ್ಸಿನಲ್ಲೂ ದಣಿವರಿಯದ ಉತ್ಸಾಹದಿಂದ 69 ಬಾರಿ ರಕ್ತದಾನ ಮಾಡಿರುವುದು ಇವರ ಸಾಮಾಜಿಕ ಬದ್ಧತೆಗೆ ಹಿಡಿದ ಕೈಗನ್ನಡಿಯಾಗಿದೆ.
ಸಹಕಾರಿ ರಂಗದ ಯಶಸ್ವಿ ಸಾರಥಿ :
ನಾಗರಾಜ್ ಅವರು ಕೇವಲ ರಕ್ತದಾನಕ್ಕಷ್ಟೇ ಸೀಮಿತವಾಗದೆ, ಯಲ್ಲಾಪುರದ ಪ್ರತಿಷ್ಠಿತ ಎಲ್.ಎಸ್.ಎಂ.ಪಿ. (LSMP) ಸಹಕಾರಿ ಸಂಘದ ಅಧ್ಯಕ್ಷರಾಗಿ ಜವಾಬ್ದಾರಿಯುತವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಇವರ ದಕ್ಷ ಹಾಗೂ ಪಾರದರ್ಶಕ ಆಡಳಿತದಿಂದಾಗಿ ಇವರ ಸಹಕಾರಿ ಸಂಘವು ಇಂದು ತಾಲೂಕಿನಲ್ಲಿ ಮಾದರಿಯಾಗಿ ಬೆಳೆದಿದೆ. ರೈತರ ಮತ್ತು ಗ್ರಾಮೀಣ ಭಾಗದ ಜನರ ಆರ್ಥಿಕ ಸಬಲೀಕರಣಕ್ಕೆ ಇವರು ಕೈಗೊಂಡ ಜನಪರ ಯೋಜನೆಗಳು ಇವರನ್ನು ಯಶಸ್ವಿ ಸಹಕಾರಿ ಮುಖಂಡನನ್ನಾಗಿ ರೂಪಿಸಿವೆ.
ಜನಸಾಮಾನ್ಯರಿಂದ ಭರಪೂರ ಪ್ರಶಂಸೆ
ಸಮಾಜದಲ್ಲಿ ಉನ್ನತ ಸ್ಥಾನ ಹಾಗೂ ಜವಾಬ್ದಾರಿಯುತ ಹುದ್ದೆಯಲ್ಲಿದ್ದರೂ, ರಕ್ತದಾನದಂತಹ ಪವಿತ್ರ ಕಾರ್ಯಕ್ಕೆ ಸದಾ ಸಿದ್ಧರಿರುವ ಇವರ ಸರಳತೆ ಮತ್ತು ಮಾನವೀಯ ಗುಣಕ್ಕೆ ತಾಲೂಕಿನ ಸಾರ್ವಜನಿಕರು ಹಾಗೂ ಗಣ್ಯರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. 53ರ ಹರೆಯದಲ್ಲೂ 69ನೇ ಬಾರಿ ರಕ್ತದಾನದ ಮೈಲಿಗಲ್ಲು ತಲುಪಿರುವ ಇವರ ಜೀವದಾತ ಸೇವೆ ಹೀಗೆಯೇ ನಿರಂತರವಾಗಿ ಸಾಗಲಿ ಎಂದು ತಾಲೂಕಿನ ಸಾರ್ವಜನಿಕರು ಹಾರೈಸಿದ್ದಾರೆ.

ರಕ್ತದಾನದ ಆರೋಗ್ಯದ ಲಾಭಗಳು:

ರಕ್ತದಾನವನ್ನು ಕೇವಲ ಮತ್ತೊಬ್ಬರ ಜೀವ ಉಳಿಸುವ ಪುಣ್ಯದ ಕೆಲಸ ಎಂದು ಭಾವಿಸಲಾಗುತ್ತದೆ. ಆದರೆ, ರಕ್ತದಾನ ಮಾಡುವುದರಿಂದ ದಾನಿಯ ಆರೋಗ್ಯಕ್ಕೂ ಹತ್ತಾರು ಅದ್ಭುತ ಪ್ರಯೋಜನಗಳಿವೆ ಎಂಬುದನ್ನು ವೈದ್ಯಕೀಯ ವಿಜ್ಞಾನ ನಿರೂಪಿಸಿದೆ. ನಾಗರಾಜ್ ಕವಡಿಕೇರಿ ಅವರಂತಹ ಮಹಾನ್ ದಾನಿಗಳು ಇಷ್ಟೊಂದು ಬಾರಿ ರಕ್ತದಾನ ಮಾಡಲು ಅವರ ಸದೃಢ ಆರೋಗ್ಯವೇ ಸಾಕ್ಷಿ.
ರಕ್ತದಾನ ಮಾಡುವುದರಿಂದ ಸಿಗುವ ಪ್ರಮುಖ ಉಪಯೋಗಗಳು…
ನಿಯಮಿತವಾಗಿ ರಕ್ತದಾನ ಮಾಡುವುದರಿಂದ ದೇಹದಲ್ಲಿ ಕಬ್ಬಿಣದ (Iron) ಅಂಶ ಸಮತೋಲನದಲ್ಲಿರುತ್ತದೆ. ರಕ್ತದಲ್ಲಿ ಐರನ್ ಪ್ರಮಾಣ ಹೆಚ್ಚಾದರೆ ರಕ್ತನಾಳಗಳು ಗಟ್ಟಿಯಾಗುತ್ತವೆ. ರಕ್ತದಾನ ಮಾಡುವುದರಿಂದ ಹೃದಯಾಘಾತ (Heart Attack) ಮತ್ತು ಪಾರ್ಶ್ವವಾಯು (Stroke) ಬರುವ ಅಪಾಯ ಗಣನೀಯವಾಗಿ ಕಡಿಮೆಯಾಗುತ್ತದೆ. ದೇಹದಿಂದ ರಕ್ತ ಹೊರಹೋದ ತಕ್ಷಣ, ಮೂಳೆ ಮಜ್ಜೆ (Bone Marrow) ಸಕ್ರಿಯಗೊಂಡು ಹೊಸ ರಕ್ತದ ಕಣಗಳನ್ನು (Red Blood Cells) ಉತ್ಪತ್ತಿ ಮಾಡಲು ಆರಂಭಿಸುತ್ತದೆ. ಇದರಿಂದ ದೇಹದಲ್ಲಿ ನಿರಂತರವಾಗಿ ತಾಜಾ ರಕ್ತ ಪರಿಚಲನೆಯಾಗಿ, ದೇಹಕ್ಕೆ ಹೊಸ ಚೈತನ್ಯ ಮತ್ತು ಯೌವನದ ಕಳೆ ಸಿಗುತ್ತದೆ. ದೇಹದಲ್ಲಿ ಕಬ್ಬಿಣದ ಅಂಶ ಅತಿಯಾಗಿ ಸಂಗ್ರಹವಾಗುವುದರಿಂದ ಲಿವರ್, ಶ್ವಾಸಕೋಶ ಮತ್ತು ಕರುಳಿನ ಕ್ಯಾನ್ಸರ್ ಬರುವ ಸಾಧ್ಯತೆ ಇರುತ್ತದೆ. ನಿಯಮಿತವಾಗಿ ರಕ್ತದಾನ ಮಾಡುವವರಲ್ಲಿ ಐರನ್ ನಿಯಂತ್ರಣದಲ್ಲಿರುವುದರಿಂದ ಕ್ಯಾನ್ಸರ್ ಬರುವ ಅಪಾಯ ತಾನಾಗಿಯೇ ದೂರವಾಗುತ್ತದೆ. ಒಂದು ಬಾರಿ ರಕ್ತದಾನ ಮಾಡುವುದರಿಂದ ದೇಹದಲ್ಲಿ ಸುಮಾರು ೬೫೦ ರಷ್ಟು ಕ್ಯಾಲೊರಿಗಳು ಕರಗುತ್ತವೆ. ಇದು ದೇಹದ ಅತಿಯಾದ ತೂಕವನ್ನು ಇಳಿಸಲು ಮತ್ತು ರಕ್ತದಲ್ಲಿನ ಕೆಟ್ಟ ಕೊಲೆಸ್ಟ್ರಾಲ್ ಮಟ್ಟವನ್ನು ಕಡಿಮೆ ಮಾಡಲು ಸಹಕಾರಿಯಾಗಿದೆ. ನನ್ನ ರಕ್ತದಿಂದ ಯಾರೋ ಒಬ್ಬರ ಜೀವ ಉಳಿಯಿತು” ಎಂಬ ಸಮಾಧಾನ ಮತ್ತು ಮಾನಸಿಕ ತೃಪ್ತಿ ಮನುಷ್ಯನ ಒತ್ತಡವನ್ನು (Stress) ಕಡಿಮೆ ಮಾಡುತ್ತದೆ. ಇದು ದಾನಿಗಳಲ್ಲಿ ಧನಾತ್ಮಕ ಯೋಚನೆಗಳನ್ನು ಹೆಚ್ಚಿಸಿ, ದೀರ್ಘಾಯುಷ್ಯಕ್ಕೆ ಕಾರಣವಾಗುತ್ತದೆ. ಇಂತಹ ಹತ್ತು ಹಲವು ಉಪಯೋಗಗಳು ರಕ್ತದಾನದಿಂದ ಇದೆ. ಆದ್ದರಿಂದ ಇಂತಹ ರಕ್ತದಾನದಲ್ಲಿ ನಾವೆಲ್ಲರು ಪಾಲ್ಗೊಳ್ಳೊಣ.

**#ರಕ್ತದಾನ ಮಹಾದಾನ#**