ಭಾರತ ಎ, ಶ್ರೀಲಂಕಾ ಎ ಮತ್ತು ಅಫ್ಘಾನಿಸ್ತಾನ್ ಎ ತಂಡಗಳ ನಡುವಣ ತ್ರಿಕೋನ ಸರಣಿಯಲ್ಲಿ ಟೀಮ್ ಇಂಡಿಯಾ ಫೈನಲ್ಗೇರಿದೆ. ದಂಬುಲ್ಲಾದಲ್ಲಿ ನಡೆದ ನಿರ್ಣಾಯಕ ಪಂದ್ಯದಲ್ಲಿ ಅಫ್ಘಾನಿಸ್ತಾನ್ ಎ ತಂಡದ ವಿರುದ್ಧ ಭಾರತ ಎ ತಂಡ 101 ರನ್ಗಳ ಭರ್ಜರಿ ಗೆಲುವು ದಾಖಲಿಸಿ ಫೈನಲ್ ಪ್ರವೇಶಿಸಿದೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಭಾರತ ಎ ತಂಡವು ನಾಯಕ ತಿಲಕ್ ವರ್ಮಾ (59), ಪ್ರಿಯಾಂಶ್ ಆರ್ಯ (58) ಮತ್ತು ಕುಮಾರ್ ಕುಶಾಗ್ರ (58) ಅವರ ಅತ್ಯುತ್ತಮ ಅರ್ಧಶತಕಗಳ ನೆರವಿನೊಂದಿಗೆ ನಿಗದಿತ 50 ಓವರ್ಗಳಲ್ಲಿ 319 ರನ್ ಕಲೆಹಾಕಿತು. ಬೃಹತ್ ಗುರಿಯನ್ನು ಬೆನ್ನತ್ತಿದ ಅಫ್ಘಾನಿಸ್ತಾನ್ ಎ ತಂಡವು 36.5 ಓವರ್ಗಳಲ್ಲಿ ಕೇವಲ 218 ರನ್ಗಳಿಗೆ ಆಲೌಟ್ ಆಗುವ ಮೂಲಕ ಶರಣಾಯಿತು. ಈ ಅಮೋಘ ಗೆಲುವಿನೊಂದಿಗೆ ಟೀಮ್ ಇಂಡಿಯಾದ ನೆಟ್ ರನ್ ರೇಟ್ +0.797 ಕ್ಕೇರಿದೆ.
ಫೈನಲ್ ಲೆಕ್ಕಾಚಾರ ಮತ್ತು ನೆಟ್ ರನ್ ರೇಟ್
ಈ ಭರ್ಜರಿ ಜಯದ ಪರಿಣಾಮ +0.797 ನೆಟ್ ರನ್ ರೇಟ್ ಪಡೆದುಕೊಂಡಿರುವ ಭಾರತ ತಂಡವು ಒಟ್ಟು 4 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನವನ್ನು ಅಲಂಕರಿಸಿದೆ. ಶ್ರೀಲಂಕಾ ಎ ಮತ್ತು ಅಫ್ಘಾನಿಸ್ತಾನ್ ಎ ನಡುವೆ ಕೊನೆಯ ಲೀಗ್ ಪಂದ್ಯ ನಡೆಯಲಿದ್ದು, ಆ ಪಂದ್ಯದ ಫಲಿತಾಂಶ ಏನೇ ಆದರೂ ಭಾರತದ ಫೈನಲ್ ಸ್ಥಾನಕ್ಕೆ ಯಾವುದೇ ಆಪತ್ತು ಬರುವುದಿಲ್ಲ. ಉಭಯ ತಂಡಗಳ ಮುಖಾಮುಖಿಯಲ್ಲಿ ಗೆಲ್ಲುವ ತಂಡ ಮೊದಲ ಅಥವಾ ಎರಡನೇ ಸ್ಥಾನ ಪಡೆಯಲಿದೆ. ಅತ್ಯುತ್ತಮ ನೆಟ್ ರನ್ ರೇಟ್ ಹೊಂದಿರುವ ಕಾರಣ ಟೀಮ್ ಇಂಡಿಯಾ ದ್ವಿತೀಯ ಸ್ಥಾನಕ್ಕೆ ಕುಸಿಯಬಹುದೇ ಹೊರತು, ಮೂರನೇ ಸ್ಥಾನಕ್ಕೆ ತಳ್ಳಲ್ಪಡುವ ಸಾಧ್ಯತೆ ಇಲ್ಲವೇ ಇಲ್ಲ ಎನ್ನಬಹುದು.
ಲೀಗ್ ಹಂತದ ಅಂತಿಮ ಪಂದ್ಯದ ಸಾಧ್ಯತೆಗಳು
| ಕೊನೆಯ ಪಂದ್ಯದ ಫಲಿತಾಂಶ | ಫೈನಲ್ ಲೆಕ್ಕಾಚಾರ |
| ಶ್ರೀಲಂಕಾ ‘ಎ’ ಗೆದ್ದರೆ | ಶ್ರೀಲಂಕಾ ತಂಡವು ಒಟ್ಟು 6 ಅಂಕಗಳೊಂದಿಗೆ ಫೈನಲ್ಗೆ ಎಂಟ್ರಿ ಕೊಡಲಿದೆ. ಅಫ್ಘಾನಿಸ್ತಾನ್ ಕೇವಲ 2 ಅಂಕಗಳೊಂದಿಗೆ ಸರಣಿಯಿಂದ ಅಧಿಕೃತವಾಗಿ ಹೊರಬೀಳಲಿದೆ. |
| ಅಫ್ಘಾನಿಸ್ತಾನ್ ‘ಎ’ ಗೆದ್ದರೆ | ಅಫ್ಘಾನಿಸ್ತಾನ್ ಕೂಡ ಭಾರತದಂತೆ 4 ಅಂಕಗಳನ್ನು ಪಡೆಯಲಿದ್ದು, ಫೈನಲ್ ತಲುಪುವ ತಂಡವನ್ನು ನಿರ್ಧರಿಸಲು ನೆಟ್ ರನ್ ರೇಟ್ ಗಣನೆಗೆ ಬರಲಿದೆ. |
ಭಾರತವನ್ನು ಹಿಂದಿಕ್ಕಲು ಅಫ್ಘಾನಿಸ್ತಾನಕ್ಕೆ ಬೇಕು ಪವಾಡ
ಭಾರತ ಎ ತಂಡವು ಅಫ್ಘಾನಿಸ್ತಾನ್ ಎ ವಿರುದ್ಧ ಬೃಹತ್ ಆಂತರದಿಂದ ಗೆದ್ದಿರುವುದರಿಂದ, ಟೀಮ್ ಇಂಡಿಯಾ ರನ್ ರೇಟ್ ಅತ್ಯಂತ ಬಲಿಷ್ಠವಾಗಿದೆ. ಅಫ್ಘಾನಿಸ್ತಾನ್ ಎ ತಂಡವು ಕೊನೆಯ ಪಂದ್ಯದಲ್ಲಿ ಶ್ರೀಲಂಕಾವನ್ನು ಸೋಲಿಸಿದರೂ, ಅವರ ಪ್ರಸ್ತುತ ಕಳಪೆ ರನ್ ರೇಟ್ (-1.983) ಕಾರಣದಿಂದ ಭಾರತವನ್ನು ಹಿಂದಿಕ್ಕುವುದು ಕಷ್ಟಸಾಧ್ಯ. ಅಫ್ಘಾನಿಸ್ತಾನ ಅಗ್ರಸ್ಥಾನಕ್ಕೇರಬೇಕಾದರೆ ಮೈದಾನದಲ್ಲಿ ಪವಾಡವೇ ನಡೆಯಬೇಕು. ಮೊದಲು ಬ್ಯಾಟಿಂಗ್ ಮಾಡಿದರೆ 300 ರನ್ ಗಳಿಸಿ, ಶ್ರೀಲಂಕಾ ತಂಡವನ್ನು ಕೇವಲ 15 ರಿಂದ 20 ರನ್ಗಳ ಒಳಗೆ ಆಲೌಟ್ ಮಾಡಬೇಕು.
ಒಂದು ವೇಳೆ ಚೇಸಿಂಗ್ ಮಾಡಿದರೆ, ಶ್ರೀಲಂಕಾ ನೀಡುವ 200 ರನ್ಗಳ ಗುರಿಯನ್ನು ಕೇವಲ 2 ರಿಂದ 3 ಓವರ್ಗಳಲ್ಲಿ ಬೆನ್ನಟ್ಟಬೇಕು. ಇಂತಹ ಫಲಿತಾಂಶ ಮೂಡಿಬರುವುದು ಅಸಾಧ್ಯವಾದ ಕಾರಣ, ಒಂದು ವೇಳೆ ಅಫ್ಘಾನ್ ತಂಡ ಗೆದ್ದರೂ ಭಾರತ ತಂಡ ದ್ವಿತೀಯ ಸ್ಥಾನಿಯಾಗಿ ಫೈನಲ್ ಪ್ರವೇಶಿಸಲಿದೆ. ಹೀಗಾಗಿ ಭಾನುವಾರ ನಡೆಯಲಿರುವ ಅಂತಿಮ ಹಣಾಹಣಿಯಲ್ಲಿ ಟೀಮ್ ಇಂಡಿಯಾ ಕಣಕ್ಕಿಳಿಯುವುದು ನೂರಕ್ಕೆ ನೂರು ಖಚಿತವಾಗಿದೆ.
Leave a Reply