ನವದೆಹಲಿ: ಕೇವಲ ಕೆಲವು ತಿಂಗಳ ಹಿಂದಷ್ಟೇ ಟಿ20 ವಿಶ್ವಕಪ್ ಗೆದ್ದುಕೊಟ್ಟ ನಾಯಕ ಸೂರ್ಯಕುಮಾರ್ ಯಾದವ್ ಅವರನ್ನು ದಿಢೀರನೆ ತಂಡದಿಂದ ಕೈಬಿಟ್ಟಿರುವುದು ಭಾರತೀಯ ಕ್ರಿಕೆಟ್ ಇತಿಹಾಸದಲ್ಲೇ ಒಂದು ‘ಮೈಲಿಗಲ್ಲು’ (Landmark day) ಎಂದು ಮಾಜಿ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಅಜಿತ್ ಅಗರ್ಕರ್ ನೇತೃತ್ವದ ಆಯ್ಕೆ ಸಮಿತಿಯು ಶನಿವಾರ ಮುಂಬರುವ ಐರ್ಲೆಂಡ್, ಇಂಗ್ಲೆಂಡ್ ಸರಣಿ ಹಾಗೂ ಏಷ್ಯನ್ ಗೇಮ್ಸ್ ಟೂರ್ನಿಗಳಿಗೆ ತಂಡವನ್ನು ಪ್ರಕಟಿಸಿದ್ದು, ಸೂರ್ಯಕುಮಾರ್ ಯಾದವ್ ಅವರನ್ನು ನಾಯಕತ್ವ ಹಾಗೂ ತಂಡದಿಂದ ಕೈಬಿಟ್ಟು ಆ ಜಾಗಕ್ಕೆ ಶ್ರೇಯಸ್ ಅಯ್ಯರ್ ಅವರನ್ನು ಆಯ್ಕೆ ಮಾಡಿದೆ. 35 ವರ್ಷದ ಸೂರ್ಯಕುಮಾರ್ ಪಾಲಿಗೆ ಇದು ಅಕ್ಷರಶಃ ಬರಸಿಡಿಲಾಗಿ ಎರಗಿದೆ.
ಸೂರ್ಯಕುಮಾರ್ ಯಾದವ್ ಅವರ ಕಳಪೆ ಬ್ಯಾಟಿಂಗ್ ಫಾರ್ಮ್ ಅವರನ್ನು ತಂಡದಿಂದ ಹೊರಹಾಕಲು ಪ್ರಮುಖ ಕಾರಣವಾಗಿದೆ. 2025ರ ಸಾಲಿನಲ್ಲಿ ಅವರು ಭಾರತದ ಪರ ಒಂದೇ ಒಂದು ಅರ್ಧಶತಕವನ್ನೂ ಸಿಡಿಸಿರಲಿಲ್ಲ. ಇನ್ನು 2026ರ ಟಿ20 ವಿಶ್ವಕಪ್ನಲ್ಲಿ ಅಮೆರಿಕ ವಿರುದ್ಧದ ಪಂದ್ಯವನ್ನು ಹೊರತುಪಡಿಸಿ ಉಳಿದೆಡೆ ಅವರ ಬ್ಯಾಟ್ ಸದ್ದು ಮಾಡಿರಲಿಲ್ಲ. ಇತ್ತೀಚೆಗೆ ಮುಕ್ತಾಯವಾದ ಐಪಿಎಲ್ ಟೂರ್ನಿಯಲ್ಲೂ 300 ರನ್ಗಳ ಗಡಿ ದಾಟಲು ವಿಫಲರಾಗಿದ್ದ ಸೂರ್ಯ ಅವರ ಕಳಪೆ ಪ್ರದರ್ಶನವನ್ನು ಗಂಭೀರವಾಗಿ ಪರಿಗಣಿಸಿದ ಆಯ್ಕೆ ಸಮಿತಿ ಅಂತಿಮವಾಗಿ ಈ ಕಠಿಣ ನಿರ್ಧಾರ ಕೈಗೊಂಡಿದೆ.
ಇಎಸ್ಪಿಎನ್ ಕ್ರಿಕ್ಇನ್ಫೋ (ESPNcricinfo) ಜೊತೆ ಈ ಕುರಿತು ಮುಕ್ತವಾಗಿ ಮಾತನಾಡಿರುವ ಅಶ್ವಿನ್, ಸೂರ್ಯಕುಮಾರ್ ನಾಯಕನಾಗಿ ಅತ್ಯದ್ಭುತವಾಗಿ ಕಾರ್ಯನಿರ್ವಹಿಸಿದ್ದಾರೆ. ಎಷ್ಟೇ ಕಳಪೆ ಫಾರ್ಮ್ನಲ್ಲಿದ್ದರೂ, ಅವರು ಸಾಧಿಸಿದ ಐತಿಹಾಸಿಕ ಸಾಧನೆಯನ್ನು ಪರಿಗಣಿಸಿ ಅವರಿಗೆ ಮುಂಬರುವ ಇಂಗ್ಲೆಂಡ್ ಸರಣಿಯಲ್ಲಿ ತಮ್ಮ ಸಾಮರ್ಥ್ಯ ಸಾಬೀತುಪಡಿಸಲು ಮತ್ತೊಂದು ಕೊನೆಯ ಅವಕಾಶ ನೀಡಬೇಕಿತ್ತು ಎಂದಿದ್ದಾರೆ.
”ಇದೊಂದು ಅತ್ಯಂತ ಕುತೂಹಲಕಾರಿ ಪೂರ್ವನಿದರ್ಶನ (Precedent) ಎನ್ನಬಹುದು. ನಾನು ಸೂರ್ಯಕುಮಾರ್ ಸ್ಥಾನದಲ್ಲಿ ನಿಂತು ಯೋಚಿಸುತ್ತಿದ್ದೇನೆ. ತಂಡದಿಂದ ಹೊರಬಿದ್ದಾಗ ಯಾವುದೇ ಆಟಗಾರನಿಗೆ ಬೇಸರವಾಗುವುದು ಸಹಜ. ಆದರೆ, ಅವರನ್ನು ಕೈಬಿಟ್ಟ ರೀತಿಯ ಬಗ್ಗೆ ನನಗೆ ಸ್ವಲ್ಪ ಆತಂಕವಿದೆ. ನಾನು ವಿಶ್ವಕಪ್ ಗೆದ್ದ ನಾಯಕ, ಕಳೆದ 15-18 ತಿಂಗಳುಗಳಿಂದ ನನ್ನ ಬ್ಯಾಟಿಂಗ್ ಫಾರ್ಮ್ ಕೈಕೊಟ್ಟಿರಬಹುದು, ಆದರೆ ನನ್ನ ನಾಯಕತ್ವದಲ್ಲಿ ದೇಶಕ್ಕೆ ವಿಶ್ವಕಪ್ ತಂದುಕೊಟ್ಟಿದ್ದೇನೆ ಎಂದು ಸೂರ್ಯ ಯೋಚಿಸುತ್ತಿರಬಹುದು. ತಂಡದ ಇತರರಂತೆ ನಾಯಕನಾಗಿಯೂ ಅವರು ತಮ್ಮ ಪಾತ್ರವನ್ನು ಸಮರ್ಥವಾಗಿ ನಿಭಾಯಿಸಿದ್ದಾರೆ. ಅವರ ಈ ಸಾಧನೆಗೆ ಬೆಲೆ ಕೊಟ್ಟು ಕನಿಷ್ಠ ಒಂದು ಅವಕಾಶ ನೀಡಬೇಕಿತ್ತು,” ಎಂದು ಅಶ್ವಿನ್ ಹೇಳಿದ್ದಾರೆ.
ಮುಂದಿನ ಎರಡು ವರ್ಷಗಳ ಭವಿಷ್ಯದ ದೃಷ್ಟಿಯಿಂದ ಹೊಸ ತಂಡವನ್ನು ಕಟ್ಟುವ ಉದ್ದೇಶದಿಂದ ಈ ಕಠಿಣ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಆಯ್ಕೆ ಸಮಿತಿ ಅಧ್ಯಕ್ಷ ಅಜಿತ್ ಅಗರ್ಕರ್ ಶನಿವಾರದ ಸುದ್ದಿಗೋಷ್ಠಿಯಲ್ಲಿ ಸಮರ್ಥಿಸಿಕೊಂಡಿದ್ದರು. ಅಗರ್ಕರ್ ಅವರ ಮುಂದಾಲೋಚನೆಯನ್ನು ಒಪ್ಪಿಕೊಂಡರೂ, ಹಿರಿಯ ಆಟಗಾರನಿಗೆ ಇಂಗ್ಲೆಂಡ್ ಸರಣಿಯಂತಹ ದೊಡ್ಡ ವೇದಿಕೆಯಲ್ಲಿ ತಮ್ಮನ್ನು ತಾವು ಸಾಬೀತುಪಡಿಸಲು ಒಂದು ಅವಕಾಶ ನೀಡಬಹುದಿತ್ತು ಎಂದು ಅಶ್ವಿನ್ ಅಭಿಪ್ರಾಯಪಟ್ಟಿದ್ದಾರೆ.
”ಟಿ20 ವಿಶ್ವಕಪ್ ಗೆದ್ದ ನಾಯಕನೊಬ್ಬನಿಗೆ ಯಾವುದೇ ಮುನ್ಸೂಚನೆ (Ultimatum) ನೀಡದೆ ದಿಢೀರನೆ ತಂಡದಿಂದ ಕೈಬಿಟ್ಟ ಉದಾಹರಣೆ ಈ ಹಿಂದೆ ಎಲ್ಲಾದರೂ ನಡೆದಿದೆಯೇ? ಈ ಕುರಿತು ಆಟಗಾರನ ಜೊತೆ ಆಯ್ಕೆ ಸಮಿತಿ ಸಂವಹನ ನಡೆಸಿರಬಹುದು, ಅದರಲ್ಲಿ ಅನುಮಾನವಿಲ್ಲ. ಆದರೆ, ಇದು ಮುಂದಿನ ದಿನಗಳಲ್ಲಿ ಒಂದು ಪೂರ್ವನಿದರ್ಶನವಾಗಿ ಉಳಿಯಲಿದೆ. ಟಿ20 ಎನ್ನುವುದು ಅಪಾಯಕಾರಿ ಆಟ, ಬ್ಯಾಟರ್ಗಳು ರಿಸ್ಕ್ ತೆಗೆದುಕೊಂಡು ಆಡಬೇಕಾಗುತ್ತದೆ. ಹೀಗಿರುವಾಗ ಹಾಲಿ ಚಾಂಪಿಯನ್ ತಂಡದ ನಾಯಕನಿಗೆ ಇದಕ್ಕಿಂತ ಸ್ವಲ್ಪ ಉತ್ತಮವಾದ ವಿದಾಯ ಅಥವಾ ಅವಕಾಶ ನೀಡಬಹುದಿತ್ತು” ಎಂದು ಅಶ್ವಿನ್ ಬಿಸಿಸಿಐ ಆಯ್ಕೆ ಸಮಿತಿಯನ್ನು ಪ್ರಶ್ನಿಸಿದ್ದಾರೆ.
Leave a Reply