ಮಾಜಿ ಪ್ರಧಾನಿ ಐ.ಕೆ. ಗುಜ್ರಾಲ್ ಅವರ ಪುತ್ರ ಹಾಗೂ ಮಾಜಿ ರಾಜ್ಯಸಭಾ ಸದಸ್ಯರಾದ ನರೇಶ್ ಗುಜ್ರಾಲ್ ಅವರು ಬರೋಬ್ಬರಿ 7.68 ಕೋಟಿ ರೂಪಾಯಿಗಳ ಭಾರಿ ಸೈಬರ್ ವಂಚನೆಗೆ ಬಲಿಯಾಗಿದ್ದಾರೆ. ವಂಚಕರು ಅವರ ವಾಟ್ಸಾಪ್ (WhatsApp) ಖಾತೆಯನ್ನು ಹ್ಯಾಕ್ ಮಾಡಿ, ಅವರದೇ ಕಂಪನಿಯ ಮುಖ್ಯ ಹಣಕಾಸು ಅಧಿಕಾರಿಗೆ (CFO) ಸಂದೇಶ ಕಳುಹಿಸುವ ಮೂಲಕ ಈ ಬೃಹತ್ ಮೊತ್ತವನ್ನು ಲಪಟಾಯಿಸಿದ್ದಾರೆ. ಈ ಪ್ರಕರಣವನ್ನು ದೆಹಲಿ ಪೊಲೀಸರ ವಿಶೇಷ ಸೈಬರ್ ಕ್ರೈಂ ತನಿಖಾ ಘಟಕವಾದ ‘ಐಎಫ್ಎಸ್ಒ’ (IFSO) ಭೇದಿಸುತ್ತಿದೆ.
ವಂಚಕರು ವಾಟ್ಸಾಪ್ ಮೂಲಕ ಖೆಡ್ಡಾಗೆ ಕೆಡವಿದ್ದು ಹೇಗೆ?
ನರೇಶ್ ಗುಜ್ರಾಲ್ ಅವರು ದಕ್ಷಿಣ ದೆಹಲಿಯ ಓಖ್ಲಾದಲ್ಲಿ ಜವಳಿ, ಚರ್ಮ ಮತ್ತು ಇತರ ಉಡುಪುಗಳ ಉತ್ಪನ್ನಗಳ ತಯಾರಿಕಾ ಕಂಪನಿಯನ್ನು ನಡೆಸುತ್ತಿದ್ದಾರೆ. ಜೂನ್ 12 ರಿಂದ 16 ರ ನಡುವೆ ಈ ಭಾರೀ ವಂಚನೆ ನಡೆದಿದೆ. ಜೂನ್ 12 ರಂದು, ವಂಚಕರು ನರೇಶ್ ಅವರ ವಾಟ್ಸಾಪ್ ಖಾತೆಯನ್ನು ಹ್ಯಾಕ್ ಮಾಡಿ, ಅವರದ್ದೇ ಪ್ರೊಫೈಲ್ ಫೋಟೋ ಇರುವ ನಂಬರ್ನಿಂದ ಕಂಪನಿಯ ಸಿಎಫ್ಒ ಶುಭಂ ಸಿಂಗ್ ಅವರಿಗೆ ಮೆಸೇಜ್ ಮಾಡಿದ್ದಾರೆ. ವ್ಯವಹಾರದ ಉದ್ದೇಶಕ್ಕಾಗಿ ಆರ್ಟಿಜಿಎಸ್ (RTGS) ಮೂಲಕ ನಿರ್ದಿಷ್ಟ ಬ್ಯಾಂಕ್ ಖಾತೆಗೆ ತಕ್ಷಣ ಹಣ ಜಮೆ ಮಾಡುವಂತೆ ವಂಚಕರು ಮೆಸೇಜ್ನಲ್ಲಿ ಸೂಚಿಸಿದ್ದಾರೆ. ಈ ಸಂದೇಶವು ಖುದ್ದಾಗಿ ತಮ್ಮ ಬಾಸ್ ನರೇಶ್ ಗುಜ್ರಾಲ್ ಅವರಿಂದಲೇ ಬಂದಿದೆ ಎಂದು ಸಂಪೂರ್ಣವಾಗಿ ನಂಬಿದ ಸಿಎಫ್ಒ, ನಾಲ್ಕು ಹಂತಗಳಲ್ಲಿ ಒಟ್ಟು 7.68 ಕೋಟಿ ರೂ.ಗಳನ್ನು ವರ್ಗಾವಣೆ ಮಾಡಿದ್ದಾರೆ.
ಪ್ರಕರಣ ಬೆಳಕಿಗೆ ಬಂದಿದ್ದು ಹೇಗೆ?
ಸಿಎಫ್ಒ ಶುಭಂ ಸಿಂಗ್ ಅವರು ಈ ವರ್ಗಾವಣೆಯನ್ನು ಕಂಪನಿಯ ದಿನನಿತ್ಯದ ವ್ಯವಹಾರದ ಒಂದು ಭಾಗ ಎಂದೇ ಭಾವಿಸಿದ್ದರು. ಆದರೆ, ಬ್ಯಾಂಕ್ ಅಧಿಕಾರಿಗಳು ಇಷ್ಟು ದೊಡ್ಡ ಮೊತ್ತದ ವಹಿವಾಟುಗಳ ಬಗ್ಗೆ ಅನುಮಾನ ವ್ಯಕ್ತಪಡಿಸಿ ಅಲರ್ಟ್ ಮಾಡಿದ್ದಾರೆ. ಜೂನ್ 16 ರಂದು ಅನುಮಾನಗೊಂಡ ಸಿಎಫ್ಒ, ಈ ಹಣಕಾಸು ವರ್ಗಾವಣೆಯ ಕುರಿತು ನರೇಶ್ ಅವರ ಪುತ್ರಿಗೆ ಮಾಹಿತಿ ನೀಡಿದ್ದಾರೆ. ತಕ್ಷಣವೇ ಪುತ್ರಿ ತನ್ನ ತಂದೆಯನ್ನು ವಿಚಾರಿಸಿದಾಗ, ತಾವು ಸಿಎಫ್ಒಗೆ ಯಾವುದೇ ಹಣ ವರ್ಗಾವಣೆ ಮಾಡುವಂತೆ ಸೂಚನೆಯನ್ನೇ ನೀಡಿಲ್ಲ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ. ಆಗಲೇ ಕುಟುಂಬಕ್ಕೆ ತಾವು ಆನ್ಲೈನ್ ವಂಚಕರ ಜಾಲಕ್ಕೆ ಬಿದ್ದಿರುವ ಆಘಾತಕಾರಿ ವಿಚಾರ ಅರಿವಿಗೆ ಬಂದಿದೆ.
ಪೊಲೀಸರ ತ್ವರಿತ ಕಾರ್ಯಾಚರಣೆ ಮತ್ತು ಹಣ ಜಪ್ತಿ
ಜೂನ್ 16 ರಂದು ನರೇಶ್ ಗುಜ್ರಾಲ್ ಅವರು ನೀಡಿದ ದೂರಿನ ಮೇರೆಗೆ ಎಫ್ಐಆರ್ ದಾಖಲಿಸಿಕೊಂಡಿರುವ ದೆಹಲಿ ಪೊಲೀಸರು ತ್ವರಿತ ಕಾರ್ಯಾಚರಣೆ ಕೈಗೊಂಡಿದ್ದಾರೆ. ವಂಚಕರು ವಂಚಿಸಿದ ಒಟ್ಟು 7.68 ಕೋಟಿ ರೂ. ಹಣವನ್ನು ಮೂರರಿಂದ ನಾಲ್ಕು ವಿವಿಧ ಬ್ಯಾಂಕ್ ಖಾತೆಗಳಿಗೆ ಹಂಚಿದ್ದರು. ದೂರು ದಾಖಲಾದ ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸ್ ತಂಡ, ವಿವಿಧ ಬ್ಯಾಂಕ್ಗಳ ಜೊತೆ ಸಮನ್ವಯ ಸಾಧಿಸಿ ಆ ಒಟ್ಟು ಮೊತ್ತದಲ್ಲಿ 4.28 ಕೋಟಿ ರೂ.ಗಳನ್ನು ಸ್ಥಗಿತಗೊಳಿಸುವಲ್ಲಿ (Lien/Hold) ಯಶಸ್ವಿಯಾಗಿದೆ. ವಂಚನೆ ಜಾಲದಲ್ಲಿ ಭಾಗಿಯಾಗಿರುವ ಆರೋಪಿಗಳನ್ನು ಬಂಧಿಸಲು ತೀವ್ರ ಶೋಧ ನಡೆಸಲಾಗುತ್ತಿದೆ ಎಂದು ಐಎಫ್ಎಸ್ಒ ವಿಭಾಗದ ಡಿಸಿಪಿ ವಿನೀತ್ ಕುಮಾರ್ ಅವರು ಮಾಹಿತಿ ನೀಡಿದ್ದಾರೆ.
Leave a Reply