ನವದೆಹಲಿ: ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯ ಕುಸಿಯುತ್ತಿರುವ ಬಗ್ಗೆ ಆತಂಕಪಡುವ ಅಗತ್ಯವಿಲ್ಲ. ರೂಪಾಯಿ ಮೌಲ್ಯ 100ರ ಗಡಿ ಮುಟ್ಟುವುದು ಕೇವಲ ಮಾನಸಿಕ ವಿಚಾರವೇ ಹೊರತು, ಹೂಡಿಕೆದಾರರು ಮತ್ತು ನಾಗರಿಕರು ತಪ್ಪು ಅಂಕಿ-ಅಂಶಗಳ ಬಗ್ಗೆ ತಲೆಕೆಡಿಸಿಕೊಳ್ಳುತ್ತಿದ್ದಾರೆ ಎಂದು ಪ್ರಧಾನಮಂತ್ರಿಗಳ ಆರ್ಥಿಕ ಸಲಹಾ ಮಂಡಳಿಯ (EAC-PM) ಸದಸ್ಯೆ ಡಾ. ಶಮಿಕಾ ರವಿ ಸ್ಪಷ್ಟಪಡಿಸಿದ್ದಾರೆ.
ಎಎನ್ಐ (ANI) ಪಾಡ್ಕ್ಯಾಸ್ಟ್ನಲ್ಲಿ ಮಾತನಾಡಿದ ಅವರು, ಇಂಧನ ಬೆಲೆ ಏರಿಕೆ, ಜಾಗತಿಕ ಅನಿಶ್ಚಿತತೆ ಮತ್ತು ಬಾಹ್ಯ ಆಘಾತಗಳಿಂದ ಭಾರತದ ಆರ್ಥಿಕ ಬೆಳವಣಿಗೆಯ ವೇಗ ಕುಂಠಿತಗೊಳ್ಳಲಿದೆ ಎಂಬ ಭೀತಿಯನ್ನು ತಳ್ಳಿಹಾಕಿದರು. ದೇಶದ ದೀರ್ಘಕಾಲೀನ ಆರ್ಥಿಕ ಬೆಳವಣಿಗೆಯ ಹಾದಿ ಸುಭದ್ರವಾಗಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ರೂಪಾಯಿ ಕುಸಿತ ಮತ್ತು ಹಣದುಬ್ಬರದ ಲೆಕ್ಕಾಚಾರ:
ರೂಪಾಯಿ ಮೌಲ್ಯ ಕುಸಿತವು ಆರ್ಥಿಕತೆಯ ಮೇಲಿನ ಒತ್ತಡವನ್ನು ನಿಭಾಯಿಸುವ ಒಂದು ಪ್ರಮುಖ ‘ಕವಾಟ’ (Valve) ಆಗಿ ಕಾರ್ಯನಿರ್ವಹಿಸುತ್ತದೆ ಎಂದು ಡಾ. ಶಮಿಕಾ ವಿಶ್ಲೇಷಿಸಿದ್ದಾರೆ.
ಕೃತಕ ನಿಯಂತ್ರಣ ಅಪಾಯಕಾರಿ: ಸರ್ಕಾರದ ಅಥವಾ ರಿಸರ್ವ್ ಬ್ಯಾಂಕ್ (RBI) ಮಧ್ಯಪ್ರವೇಶಿಸಿ ರೂಪಾಯಿ ಮೌಲ್ಯವನ್ನು ಕೃತಕವಾಗಿ ಒಂದು ನಿರ್ದಿಷ್ಟ ಮಟ್ಟದಲ್ಲಿ ಕಾಯ್ದುಕೊಳ್ಳಲು ಪ್ರಯತ್ನಿಸಿದರೆ, ಅದು ಹಣದುಬ್ಬರಕ್ಕೆ (Inflation) ದಾರಿ ಮಾಡಿಕೊಡುತ್ತದೆ. ಮಾರುಕಟ್ಟೆ ಶಕ್ತಿಗಳೇ ರೂಪಾಯಿ ಮೌಲ್ಯವನ್ನು ನಿರ್ಧರಿಸಲು ಬಿಡುವುದು ಸೂಕ್ತ.
ಜಾಗತಿಕ ವಿದ್ಯಮಾನಗಳ ಪ್ರಭಾವ: ಪ್ರಸ್ತುತ ನಾವು ಎದುರಿಸುತ್ತಿರುವ ಆರ್ಥಿಕ ಸವಾಲುಗಳು ದೇಶೀಯ ದೌರ್ಬಲ್ಯಗಳಿಗಿಂತ ಹೆಚ್ಚಾಗಿ ಜಾಗತಿಕ ವಿದ್ಯಮಾನಗಳಿಂದ (ಉದಾಹರಣೆಗೆ: ಜಿಯೋಪೊಲಿಟಿಕಲ್ ಬಿಕ್ಕಟ್ಟು, ಇಂಧನ ಮಾರುಕಟ್ಟೆ ಒತ್ತಡ) ಸೃಷ್ಟಿಯಾಗಿವೆ. ನಮ್ಮಲ್ಲಿರುವ ಸಂಪನ್ಮೂಲಗಳ ಮೂಲಕ ಇದನ್ನು ನಾವು ಸಮರ್ಥವಾಗಿ ಎದುರಿಸಲಿದ್ದೇವೆ ಎಂದಿದ್ದಾರೆ.
“100 ಅನ್ನೋದು ಕೇವಲ ಒಂದು ಸಂಖ್ಯೆಯಷ್ಟೇ…”
“ರೂಪಾಯಿ ಮೌಲ್ಯ 100ರ ಗಡಿ ಮುಟ್ಟುತ್ತದೆ ಎಂಬುದು ಕೇವಲ ಒಂದು ಸಂಖ್ಯೆಯಷ್ಟೇ. ಭಾರತದ ಆರ್ಥಿಕತೆಯು ನಿರಂತರವಾದ ಮತ್ತು ಸುಸ್ಥಿರವಾದ ಹೆಚ್ಚಿನ ಬೆಳವಣಿಗೆಯ (Sustained high growth) ಹಂತದಲ್ಲಿದೆ. ರಫ್ತು-ಅವಲಂಬಿತ ದೇಶಗಳಿಗಿಂತ ಭಿನ್ನವಾಗಿ, ಭಾರತವು ತನ್ನ ಬೃಹತ್ ದೇಶೀಯ ಬಳಕೆಯ (Domestic consumption) ಮೇಲೆ ಹೆಚ್ಚು ಅವಲಂಬಿತವಾಗಿದೆ. ಇದು ಜಾಗತಿಕ ಆರ್ಥಿಕ ಏರಿಳಿತಗಳ ವಿರುದ್ಧ ನಮಗೆ ರಕ್ಷಾಕವಚ ಒದಗಿಸುತ್ತದೆ.” ಎಂದು ಅವರು ತಿಳಿಸಿದ್ದಾರೆ.
ಜಾಗತಿಕ ಕೃತಕ ಬುದ್ಧಿಮತ್ತೆ (AI) ಹಬ್ ಆಗಲಿದೆ ಭಾರತ!
ಭಾರತವು ಎಐ (AI) ಓಟದಲ್ಲಿ ಹಿಂದುಳಿದಿದೆ ಎಂಬ ಟೀಕೆಗಳಿಗೆ ಉತ್ತರಿಸಿದ ಅವರು, ಕೇವಲ ಅಡ್ವಾನ್ಸ್ಡ್ ಚಿಪ್ಗಳು ಮತ್ತು ಕಂಪ್ಯೂಟಿಂಗ್ ಮೂಲಸೌಕರ್ಯಗಳ ಆಧಾರದ ಮೇಲೆ ಈ ನಿರ್ಧಾರಕ್ಕೆ ಬರುವುದು ತಪ್ಪು ಎಂದರು.
”ಡೇಟಾ, ತಂತ್ರಜ್ಞಾನ ಅಳವಡಿಕೆ ಮತ್ತು ಅಪ್ಲಿಕೇಶನ್ಗಳ ಬಳಕೆಯಲ್ಲಿ ಭಾರತವು ಇತರ ಎಲ್ಲಾ ಆರ್ಥಿಕತೆಗಳಿಗಿಂತ ಮುಂದಿದೆ. ಭವಿಷ್ಯದಲ್ಲಿ ಭಾರತವು ಕೃತಕ ಬುದ್ಧಿಮತ್ತೆಯ ಸಹಜ ತವರೂರಾಗಲಿದೆ (Natural home for AI).”
”ಅಮೆರಿಕದಂತಹ ಮಾರುಕಟ್ಟೆಗಳಲ್ಲಿ ಎಐ ಮೇಲೆ ವಿಪರೀತ ಹಣ ಸುರಿಯಲಾಗುತ್ತಿದ್ದು, ಅಲ್ಲೊಂದು ‘ಬಬಲ್’ ಸೃಷ್ಟಿಯಾಗಿದೆ. ಶೀಘ್ರದಲ್ಲೇ ಅಲ್ಲಿಯೂ ಮಾರುಕಟ್ಟೆ ತಿದ್ದುಪಡಿಯಾಗಲಿದೆ (Course correction)” ಎಂದು ಅವರು ಎಚ್ಚರಿಸಿದರು.
ಭಾರತದಲ್ಲಿ ಹೂಡಿಕೆಗೆ ಇದು ಸಕಾಲವೇ?
ಹೆಚ್ಚುತ್ತಿರುವ ಇಂಧನ ಬೆಲೆಗಳು ಕಾರ್ಪೊರೇಟ್ ಗಳಿಕೆಯ ಮೇಲೆ ತಾತ್ಕಾಲಿಕ ಪರಿಣಾಮ ಬೀರಬಹುದಾದರೂ, ವಿವೇಕಯುತ ಹಣಕಾಸು ನಿರ್ವಹಣೆ ಹಾಗೂ ನವೀಕರಿಸಬಹುದಾದ ಇಂಧನದತ್ತ (Renewable energy) ನಮ್ಮ ಒಲವು ಭಾರತವನ್ನು ಸುರಕ್ಷಿತವಾಗಿರಿಸಿದೆ. ಹೀಗಾಗಿ ಹೂಡಿಕೆದಾರರು ಭಾರತದ ಮೇಲೆ ನಂಬಿಕೆಯಿಡಲು “ಎಲ್ಲಾ ಸಮಯದಲ್ಲೂ ಇದು ಸಕಾಲವೇ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
Leave a Reply